Xəbərdarlıq: bu yolla şəxsi məlumatlarınız oğurlana bilər - VİDEO

Kiberdələduzlar yenə iş başındadırlar. Sosial şəbəkələrdə müxtəlif tanınmış şirkətlər adından saxta reklamlar hazırlayaraq vətəndaşların şəxsi məlumatlarını ələ keçirirlər. Vətəndaşı inandırmaq üçün adından istifadə olunan şirkətlərdən biri də "Azərgold" Qapalı Səhmdar Cəmiyyətidir. Şirkətin adından invetsisiya vədləri verilərək fişinq hücumları həyata keçirilir.

200 faiz gəlirli qızıl yataqlarına investisiya et - reallığa çevrilən unikal fürsət kimi təqdim edilən bu təklif əslində kiberdələduzların növbəti tələsidir. Fişinq hücumlarını yeni alət kimi seçən işbazlar bu yolla vətəndaşların şəxsi məlumatlarını əldə edirlər. İnandırıcı olmaq üçün isə Azərbaycanın tanınmış böyük şirkətlərinin orijinaldan seçilməyən loqolarından faydalanırlar.

Sosial şəbəkələrdə videoçarxlar hazırlayıb reklam şərtləri ilə yayırlar. Bu baxımdan "Azərgold" Qapalı Səhmdar Cəmiyyəti kiberdələduzların növbəti seçimidir. Şirkətin adından tirajlanan layihədə iştirak üçün ad, soyad, elektron poçt, mobil nömrə kimi fərdi məlumatlar tələb olunur. Həmin məlumatları təqdim edən və uydurma kampaniyada iştirak edən vətəndaş kiberdələduzların qurbanına çevrilir.

"Azərgold"un sözçüsü Ariz Tarverdiyev vətəndaşları rəsmi olmayan mənbələrdən məlumat almamağa çağırıb.

Məsələ ilə bağlı artıq xüsusi Rabitə və İnformasiya Təhlükəsizliyi Dövlət Xidmətinə müraciət edilib.