“Yanacaq doldurarkən sürətə fikir vermək lazımdır” - Mütəxəssisdən XƏBƏRDARLIQ

Sosial mediada yayılan şikayətlərdə bildirilir ki, bəzi yanacaq doldurma məntəqələrində işçilər benzini sürətlə və gur vurur. Bu isə yanacağın köpüklənməsinə səbəb olur. Nəticədə isə verdiyimiz puldan, məsələn, 20 manatlıq benzin vurdururuqsa, onun 16-17 manatı vurulmuş olur.

Bəs yanacaq doldurma məntəqələrində nələrə diqqət etməliyik?

Avtosfer.az-ın məlumatına görə, mövzu ilə bağlı Redaktor.az-a danışan avtomobil mütəxəssisi Əziz Abbasov bildirdi ki, yanacaq doldurma məntəqələrində benzin dolduran zaman bir neçə amillərə diqqət edilməlidir:

"Yanacaq dolduran zaman çox sürətli doldurmaq olmaz, çünki bu zaman yaranan köpük pistoldakı sensor tərəfindən maye kimi oxuna bilər və nəticədə vaxtından əvvəl “klik” edib dayanır, sanki çən doludur kimi görünür, amma əslində hava köpüyü itəndən sonra çəndə boş yer yaranır, bu da yanacağın ölçüsündə fərq edir. Benzin “uçur” - “qazlanır” kimi düşüncələr də yalnışdır, çünki benzinin buxarlanması üçün lazım olunan enerji və vaxt yanacaq doldurma prosesində kifayət deyil. ⁠Yanacaq dolduran zaman diqqət etməli olduğunuz daha başqa bir amil isə pistol “klik” edəndən sonra çəndə boş yer qalmayana kimi doldurmaq olmaz, çünki belə olduqda EVAP sistemi düzgün işləmir və zamanla sürətlər panelində “check engine” xətası yanmağa başlayır".