Yerə güclü maqnit qasırğası yaxınlaşır

2 iyul axşamı Yer kürəsində güclü maqnit qasırğasının baş verməsi gözlənilir. Avtosfer.az xəbər verir ki, bu barədə Rusiya Elmlər Akademiyasının Kosmik Tədqiqatlar İnstitutunun (İKİ RAN) Günəş Astronomiyası Laboratoriyası Telegram kanalında məlumat yayıb. Alimlərin bildirdiyinə görə, maqnit qasırğası G3 səviyyəsinə çatacaq və 2026-cı ilin mart ayından bəri ən güclü kosmik hadisə olacaq. Mütəxəssislər bildiriblər ki, G4 və daha yüksək səviyyəli radiasiya və maqnit qasırğalarının baş verməsi gözlənilmir. Lakin G3 kateqoriyasına aid güclü geomaqnit qasırğalarının baş verməsi qaçılmaz hesab olunur. Qasırğanın Moskva vaxtı ilə cümə axşamı saat 21:00-dan gecəyarısına qədər olan müddətdə başlayacağı ehtimal edilir.

Qeyd edək ki, bir gün əvvəl Günəşdə ən yüksək sinifə aid (X sinifli) güclü partlayış qeydə alınıb. İKİ RAN-ın məlumatına görə, bu hadisə Günəş aktivliyinin artmasından sonra müşahidə olunan ilk belə partlayışdır.