“Zəfər Günü tədbirləri ermənilərin təxribatlarına məruz qala bilər” - Açıqlama

"Dünya azərbaycanlılarının və dost xalqların, ölkələrin ortaq bayramına çevrilən 8 noyabr – Zəfər Günü tədbirləri ermənilərin təxribatlarına məruz qala bilər”.

Avtosfer.az bildirir ki, bunu politoloq Turan Rzayev deyib. O xatırladıb ki,  Zəfər Günü ölkəmizdə olduğu kimi, xarici ölkələrdə də təntənə ilə qeyd ediləcək:

"Xaricdə keçiriləcək tədbirlərə qarşı erməni lobbisi və diasporunun dünyanın müxtəlif regionlarında etiraz aksiyaları keçirəcəyi, Zəfər Gününə kölgə salmağa çalışacağı məlumdur. Təsadüfi deyil ki, Qarabağ klanı bu gün İrəvanda Baş nazir Nikol Paşinyan əleyhinə mitinq keçirəcəyini elan edib və eyni zamanda xarici ölkələrdəki tərəfdarlarını da küçələrə çıxmağa səsləyib”, - deyən T.Rzayev hesab edir ki, Qarabağ klanı bununla bir daha Ermənistanın 44 günlük müharibədə üzləşdiyi məğlubiyyətin məsuliyyətini Paşinyan administrasiyasının üzərinə ataraq erməni xalqının yaralarından istifadə edib, ölkə daxilində və xaricində revanşizm duyğularını oynadaraq öz nüfuzunu artırmağa çalışacaq. 

Onun fikrincə, bu istiqamətdə Qarabağ klanına xüsusilə terrorçu Daşnaksütun partiyası və onun xaricdəki büroları, həmçinin erməni lobbisi dəstək olacaq və ehtimal ki, etiraz aksiyaları ABŞ, Fransa, Almaniya, Hollandiya və s. ölkələrdə daha qabarıq şəkildə özünü büruzə verəcək: 

"Xarici ölkələrdəki yürüşlərdə etirazın hədəfi Azərbaycan olacaq. Buna görə də Azərbaycanın xarici ölkələrdəki səfirlikləri və soydaşlarımız xüsusilə diqqətli olmalıdır. Çünki ermənilər səfirliklərimizin qarşısında da toplaşacaqlar. Bundan başqa, sivil qaydada Zəfər Gününü qeyd etmək istəyəcək xaricdə yaşayan soydaşlarımıza qarşı ermənilərin provokasiyaları, hətta hücumları da ola bilər.  Ermənilərin ehtimal hücumlarının qarşısı alınması üçün xaricdə keçiriləcək Zəfər Günü tədbriləri daha güclü diaspor və lobbi fəaliyyəti olan dost ölkələr və onların xaricdə yaşayan vətəndaşlarının iştirakı ilə birlikdə keçirilə bilər. Bu, həm xarici ölkələrdə keçiriləcək Zəfər Günü tədbirlərinə həmin ölkələrin mediasının diqqətini çəkəcək, həm bizə say üstünlüyü verəcək, həm də ehtimal erməni təxribatlarının qarşısını almış olacaq.

Misal üçün, Almaniya, Avstriya və Hollandiyada keçiriləcək Zəfər Günü tədbirləri bu ölkədəki Türkiyə diasporu ilə ortaq keçirilə bilər. Çünki qeyd olunan ölkələrdə həm türk nüfuzu çoxdur, həm də türk diasporu daha güclüdür. Rusiyada keçiriləcək Zəfər Günü tədbirlərinə isə xüsusilə bu ölkədəki türk-müsəlman xalqların diasporu, diplomatları, mədəniyyət xadimləri dəvət edilə bilər. Belə olacağı təqdirdə erməni təxribatlarının qarşısı tam olaraq alınmasa da effekti azala bilər”.

Sfera.az