Zərərçəkmişlə barışan məhkum cəza çəkməkdən azad etmə barədə məhkəməyə ərizə verə biləcək

Azərbaycan Respublikasının Ədliyyə Nazirliyi Kollegiyasının qərarı ilə təsdiq edilmiş “Cəzaçəkmə müəssisələrinin Daxili İntizam Qaydaları”na dəyişiklik edilib.

Dəyişikliyə əsasən, cəzaçəkmə müəssisələrinin müdiriyyətinin hərəkətləri artırılıb.  

Belə ki, məhkumun cəzadan şərti olaraq vaxtından əvvəl azad olunması, cəzanın çəkilməmiş hissəsinin daha yüngül cəza növü ilə əvəz edilməsi, xəstəliyə görə cəzanı çəkməkdən azad edilməsi, zərərçəkmiş şəxslə barışmaqla, cinayət nəticəsində vurulmuş ziyanı və ya əldə edilmiş gəliri tamamilə ödəməklə əlaqədar cəzanı çəkməkdən azad edilməsi, habelə cəzaçəkmə müəssisəsinin növünün dəyişdirilməsi ilə bağlı ərizələri üzrə cəzaçəkmə müəssisələrinin müdiriyyətinin hərəkətləri sırasına daxil edilib.

Eyni zamanda, digər dəyişikliklə Cinayət Məcəlləsinə müvafiq olaraq zərərçəkmiş şəxslə barışmaqla, cinayət nəticəsində vurulmuş ziyanı və ya əldə edilmiş gəliri tamamilə ödəməklə bağlı cəza çəkməkdən azad etmə barədə məhkəməyə məhkumun özü, yaxud onun müdafiəçisi və ya qanuni nümayəndəsi ərizə, cəzaçəkmə müəssisəsinin rəisi isə təqdimat verəcək.