Hökumət rəsmiləri, deputatlar kütləvi HƏBS EDİLDİ - Bu ölkədə

İraqın paytaxtı Bağdadda, xüsusilə də yüksək mühafizə olunan "Yaşıl zona"da hökumət rəsmiləri, parlament üzvləri və biznesmenlərin saxlanıldığı genişmiqyaslı antikorrupsiya əməliyyatı keçirilib. Bazar günü səhər saatlarında başlayan bu əməliyyat İraqın Baş naziri Əli əl-Zaidinin birbaşa göstərişi ilə icra olunub.

Avtosfer.az xəbər verir ki, əməliyyatda İraqın elit Antiterror Xidməti, ordu və xüsusi xidmət orqanları iştirak edib. Bağdadın "Yaşıl zona"sı tam nəzarətə götürülüb, əraziyə ağır hərbi texnika yeridilib və giriş-çıxış məhdudlaşdırılıb.

Həbslərin əsasən korrupsiya, vəzifə səlahiyyətlərindən sui-istifadə, habelə silahlı qruplaşmaların maliyyələşdirilməsi və neft qaçaqmalçılığı ilə bağlı olduğu bildirilir. Məlumatlara görə, saxlanılan şəxslərin bir qismi əvvəllər korrupsiya ittihamı ilə həbs edilmiş Neft və Emal nazirinin müavini Adnan əl-Cümaylinin istintaq zamanı verdiyi ifadələr əsasında müəyyən edilib.

Baş nazir Əli əl-Zaidinin may ayında vəzifəyə gəldikdən sonra korrupsiya ilə mübarizəni prioritet kimi elan etdiyi və dövlət idarəçiliyində nəzarəti bərpa etməyə çalışdığı vurğulanır. İraq hökuməti hələlik əməliyyatla bağlı rəsmi bəyanat yaymayıb./nocomment.az