100 il əvvəl Bakını işıqlandıran alman mühərrikləri - FOTO

Əslində belə bir tapıntı gözləmirdim. Həmişəki kimi boş vaxt tapıb əntiq əşya satan mağazada qurdalanırdım və rastıma köhnə bir arayış keçdi. Başlığa baxıb şəklini çəksəm də, təfərrüata varmadım. Evdə təhlil edəndə isə çox qiymətli fakta rast gəldiyimi gördüm. 

Bakı Elektrik Cəmiyyətinin 24 iyun 1914-cü ildə verdiyi 3682 saylı arayışda İlya Yeqortsev 1911-ci ilin avqustundan 1914-cü ilin iyununadək elektrik stansiyasında “Otto Deutz” şirkətinin istehsal etdiyi qaz mühərriklərinin maşinisti işləmiş, işlədiyi dövrdə vəzifəsinə vicdanla yanaşmışdı. Öz xahişi ilə işdən azad olunur. 

Bəli, o zaman neft bumuna görə Bakıda böyük həcmdə elektrik tələb olunurdu. Bunun üçün də Avropadan generatorlar gətirilirdi. Bakıya sovet hakimiyyətindən əvvəl gətirilmiş qurğuların bir qismi hazırda Azərişıq ASC-nin muzeyində sərgilənir. 

Qeyd edək ki, 1872-ci ildə alman mühədislər Nikolaus Otto və Qotlieb Daymlerin 1872-ci ildə Kölndə qurduğu Deutz AG daxili yanma mühərrikləri sayəsində pioner hesab edilir. Qrup bu gün də fəaliyyət göstərir. 

Bu da Azərbaycan-Almaniya əlaqələri tarixindən bir səhifə.

Vüqar Yaşaroğlu