113 il öncə Bakı-Tiflis qatarının iş qrafiki – TARİXİ MƏNBƏ  - FOTO

20-ci əsrin əvvəllərində nəşr olunmuş qəzetlərə nəzər yetirdikdə ölkəmizin nəqliyyat cəhətdən kifayət qədər inkişaf etdiyini görürük. Əsrin əvvəllərində artıq Siemens, Daimler, Ford, Deutz kimi markalar azərbaycanlı mühəndislərə tanış idi. 
Avtosfer.az bu dəfə  1910-cu ildə Bakı-Tiflis qatarının iş qrafiki barədə elanı təqdim edir. Məlumat gündəlik “Səda” qəzetinin 15 sentyabr 1910-cu ildə dərc olunmuş 178-ci sayından götürülüb.
Məlumatda göstərilir ki, Zaqafqaziya Dəmir yoluna aid Bakıdan Tiflisə hər gün 3 qatar gedir.
1 saylı təcili qatar (orijinalda - skorı) sübh saat 07.04 dəqiqədə yola düşür.
11 saylı sərnişin qatarı saat 1.41 dəqiqədə (orijinalda – zöhr, yəni günorta) sərnişin platformasından yola düşür.
3 saylı qatar isə saat 12.44-də yola çıxır.
Elanda həmçinin Qatarın Tiflisə çatma qrafiki də göstərilib. Qatarlar müvafiq olaraq 10.52-də, 7.18-də və 14.44-də çatır. Başqa sözlə, qatarla Tiflisə çatmaq üçün təxminən 24 saat lazım idi. Yük qatarı bu yolu bir qədər ləng getsə də, sərnişin və təcili qatarın o dövrün standartları ilə nisbətən çevikdir.
Qeyd edək ki, Bakı-Tiflis dəmir yolu 1881-ci ildə istismara verilib. 1908-ci ildə Naxçıvan da polad magistralla tanış olub. 
1920-ci ildə siyasi sistem dəyişsə də, dəmir yoluna münasibət dəyişmədi. 1923-cü ildə artıq mənəvi və fiziki olaraq köhnəlmiş konka yerini tramvaya verdi. 1926-cı ildə isə SSRİ-də və Şərqdə ilk dəfə olaraq Bakıda elektrik qatarı istismara buraxıldı. 

Mənbənin oxunmasında köməyinə görə Milli Azərbaycan Tarixi Muzeyinin Numizmatika Fondunun əməkdaşı, tarix üzdə fəlsəfə doktoru Aygün Məmmədovaya təşəkkür edirik.

Vüqar Yaşaroğlu