22 ilə dağı yardı: təkbaşına kəndə yol çəkdi

22 il boyunca sadəcə çəkic və iskənə istifadə edərək dağı yarıb yol açdı. Söhbət hindistanlı Daşrathd Manjhidən gedir.
Avtosfer.az xəbər verir ki, Manjhi, Bihar əyalətinin Gehlaur kəndində yaşayan hindli bir fəhlə və tarla işçisi olub. Kənddən ən yaxın həkimə getmək üçün 90 km yol qət etmək lazım olurmuş. Manjhinin həyat yoldaşı 1959-cu ildə dağdan yıxılaraq ağır dərəcədə yaralanır və ən yaxın həkimə çatdırılması gecikdiyi üçün həyatını itirir. Bu hadisə Manjhidə ağır izlər buraxır. O, qərar verir ki, çəkici və iskənəsi ilə dağı yarıb yolu qısaltsın. 1960-cı ildə işə başlayır. İlk dövrlərdə kənd sakinləri ona lağ etsələr də, sonralar yemək və alət gətirərək onu dəstəkləməyə başlayıblar.
22 il boyunca Manjhi möhkəm iradəsi ilə bu yolu açmaq üçün işləyir. Nəhayət, dağı yararaq uzunluğu 110 metr, genişliyi 9 metr olan  keçidi aça bilir. Nəticədə kəndin yolu 40 km qısalır.
Xalq arasında "Dağ adamı" ləqəbi ilə tanınan bu adam baş nazir tərəfindən mükafatlandırılır. Dillərə düşmüş qəhrəman haqqında sənədli film belə çəkilib.
Nurlan Sakitoğlu