"Airshow China" beynəlxalq aviasərgisi təxirə salındı

Daha əvvəl noyabr ayına təyin olunmuş "Airshow China", yaxud "Zhuhai Airshow" beynəlxalq aviasiya və aerokosmik sərgisi koronavirus pandemiyası ilə bağlı təxirə salınıb.

Avtosfer.az bu barədə sərginin saytına istinadən xəbər verir.

“COVID-19 ilə bağlı dünyadakı vəziyyət hələ də sürətlə inkişaf edir. Qonaqlarımızın və sərgi iştirakçılarının sağlamlığı, səfərlərin təhlükəsizliyi, sərginin səviyyəsi ilə bağlı hərtərəfli müzakirələrdən sonra biz ilkin olaraq noyabr ayının 10-dan 15-dək Juhai Beynəlxalq Hava Sərgi Mərkəzində keçirilməsi nəzərdə tutulmuş 13-cü Çin Beynəlxalq Aviasiya və Aerokosmik Sərgisinin (Airshow China) qeyri-müəyyən müddətə təxirə salındığını bildiririk”, – təşkilat komitəsinin açıqlamasında bildirilir.

Qeyd edək ki, 1996-cı ildən Quanqdonq əyalətinin Juhai şəhərində mütəmadi keçirilən “Airshow China” sərgisində hərbi və mülki təyyarə və s. uçuş vasitələri, fəza cihaz və texnologiyaları, hava müdafiə sistemləri, radio elektron qoruma vasitələri nümayiş olunur.