Bələdiyyə nəqliyyatı pulsuz etdi, müxalifət narazı qaldı

Fransanın Monpelye şəhərində bələdiyyə ictimai nəqliyyatı pulsuz edib.

Avtosfer.az xəbər verir ki, 500 000 əhalisi olan şəhərdə pulsuz nəqliyyat mərhələli şəkildə tətbiq edilib. 3 il əvvəl bazar günləri tramvaylar pulsuz rejimdə işləyib. Sonradan müəyyən kateqoriyalı insanlar üçün gediş pulsuz olub. Nəhayət bu həftədən bütün Monpelye sakinləri ictimai nəqliyyatdan pulsuz faydalana bilirlər. 
Sosialist bələdiyyə sədri bildirib ki, pulsuz ictimai nəqliyyat ümumavropa öhdəliyidir. 4 nəfərlik ailənin avtomobillə hərəkət etməsi üçün ildə 1500 avro tələb olunur. Pulsuz nəqliyyat ailə büdcəsinə dəstəkdir. 
Xidmət keyfiyyətinə gəlincə, bələdiyyə intervalı 20% azaltmağı planlaşdırır. Bu məqsədlə son 1 ildə 70 elektrobus və 77 tramvay alınıb. 
Lakin müxalifət yeni qərardan narazıdır. Onların fikrincə, nəqliyyat təkcə Monpelye sakinləri deyil, qonaqlar üçün də pulsuz olmalıdır. 

Qeyd edək ki, Fransanın 45 şəhərində ictimai nəqliyyat pulsuzdur ki, bunlardan ən böyüyü Monpelyedir. Avropa səviyyəsində isə, 2013-cü ildən Tallində (Estoniya), 2020-ci ildən isə bütün Lüksemburq Hersoqluğunda ictimai nəqliyyat pulsuzdur. Pulsuz ictimai nəqliyyat sistemi əksər hallarda özünü doğruldub.

Vüqar