Bu maşın indiyədək sürülsəydi 8 milyon kilometr qət edəcəkdi - FOTO

Taksidə istismar edilən avtomobilin tez sıradan çıxması normaldır. Lakin bəzən əksi də olur. 

Avtosfer.az xəbər verir ki, yunanıstanlı taksi sürücüsü Qreqorios Saxinidis 1981-ci ildə Almaniyadan (daha doğrusu federal Almaniyadan) Mercedes 240D model avtomobil alır. 1976-cı il istehsalı olan avtomobil alınarkən çox yaxşı vəziyyətdə olub. Maşını Salonikiyə gətirən Saxinidis ondan gündəlik taksi fəaliyyətində istifadə edir. 23 il ərzində avtomobil 4 586 630 kilometr qət edir. Maşın təkcə taksi fəaliyyətinə deyil, keçmiş Yuqoslaviyada sülhyaratma missiyasında iştirakına görə də məşhur olur. Son müsahibələrinin birində saxinidis bu maşınla 9 dəfə Türkiyəyə, 90 dəfə isə Bolqarıstana getdiyini deyib. Avtomobilin bir dəfə Dizel mühərriki dəyişdirilib, əksər detallar orijinaldır. 
2004-cü ildə məsələdən xəbər tutan mercedes şirkəti rəhbərliyi yunan sürücüyə maşını Ştutqartdakı muzeyə təhvil verməyi təklif edir. Əvəzində isə ona son model C sinif avtomobili hədiyyə edilir. Bərpadan sonra avtomobil Mercedes konserninin Ştutqartdakı muzeyində əbədi yerini alır. 
Saxinidis bir müddət əvvəl dünyasını dəyişib. Lakin alman mütəxəssislərin hesablamasına görə bu avtomobil 80-ci illərdəki tempi ilə istismar edilsə idi indiyədək azı 8 milyon kilometr qət edəcəkdi.
Qeyd edək ki, Saxinidisin maşını tək deyil. Beyrutda və Malyorka adasında (İspaniya) fəaliyyət göstərən “milyonluq” taksilər barədə də avtosfer.az saytı əvvəllər məlumat verib.

Vüqar