Çin köhnə avtomobillərdən qurtulur: Bizə təsiri olacaqmı?

Çində avtomobil sənayesinin geriləməsi fonunda hökumət utilizasiya proqramına start verib. 

Avtosfer.az xəbər verir ki, bu barədə qəbul edilmiş dövlət sənədində avtoparkın yenilənməsi qaydaları yer alıb. Bura köhnə avtobusların elektrik avtobusları ilə əvəzlənməsi, köhnə maşınların utilizasiyası zamanı güzəştlər və işlənmiş avtomobillərin xaricə satışının təşviqi daxildir.
Avtomobillərin utilizasiyası China 3 (Avro 3-lə eynidir) standartına aid maşınlara tətbiq ediləcək. Bu kateqoriyaya 2011-ci ilədək istehsal edilmiş benzin, 2013-cü ilədək istehsal edilmiş Dizel və nəhayət 2018-ci ilədək istehsal edilmiş elektromobillər daxildir. 
Avtomobilini utilizasiyaya verən çinlilərə yeni maşın alarkən 1400 dollar güzəşt tətbiq ediləcək. 
Azərbaycana gəlincə: Avro 3 və ya onun analoqu olan standartlara cavab verən avtomobillərin Azərbaycana idxalına icazə verilmir. Una görə də Rusiya və Monqolustandan fərqli olaraq Azərbaycanda ikinci əl Çin avtomobillərinin bolluğunun yaranacağı istisna edilir. Azərbaycana ənənəvi olaraq ikinci əl avtomobillər əsasən Avropa, son illərdə isə Koreyadan gətirilir. Ehtiyat hissələrin gətirilməsində isə cüzi artım ola bilər. Lakin kütləvilik istisna olunur.

Vüqar