Dələ avtomobili anbara çevirdi - FOTO

ABŞ-ın Şimali Dakota ştatının sakini qəribə vəziyyətlə qarşılaşıb.

Avtosfer.az-ın xəbərinə görə, o, uzun müddətdir istifadə etmədiyi pikapın kapotunu qaldırarkən maraqlı halla qarşılaşıb. 

Məlum olub ki, yaxınlıqda yaşayan dələ “Chevrolet Avalanche”ın kapotunun altını və qanad boşluqlarını sözün həqiqi mənasında anbara çevirib. Heyvan yaxınlıqdakı ağaclardan topladığı qozları bura qış azuqəsi kimi toplayıb. 

Qozları boşaltmaq üçün avtomobilin kapotu, qabaq bamperi və qanadları sökülüb. Ümumilikdə isə boşluqlardan 68 kiloqram qoz çıxıb. 

Burada bir xatırlatma yerinə düşər. İstər beynəlxalq, istərsə də yerli qanunvericilikdə sürücüdən hərəkətə başlamazdan əvvəl təhlükəsizlikdən əmin olmaq tələb edilir. Buna görə də uzun müddət dayanmış avtomobili vizual müşahidə etmədən hərəkətə başlamaq olmaz. Xüsusən də qış aylarında isti yer axtaran sahibsiz pişiklərin mühərrik bölməsinə girməsi tez-tez rastlanan haldır.