Elektromobillər tez alışır: Mif, yoxsa reallıq? - FOTO

Sosial şəbəkələr kütləni nəyəsə inandırmaqda çox səmərəlidir.  Lakin bu inandırılan mövzuların çoxu reallıqdan uzaqdır. 
Avtosfer.az xəbər verir ki, bir çox ölkədə sosial şəbəkələr insanları elektromobillərin daha müntəzəm yandığına inandırıb. Lakin elektromobillərin geniş yayıldığı ölkələrdəki tədqiqatlar bunun əksini deyir. 
Avstraliyanın EV Fire Safe təşkilatı son 10 il ərzində avtomobillərin yanma riskini araşdırıb. Məlum olub ki, daxiliyanma mühərrikli avtomobillərdə yanma göstəricisi 0,1% təşkil edibsə, elektromobillərdə göstərici 0,0012% olub. Onda bir hara, on mində bir hara!
2022-ci ildə İsveçdə hər 100 min avtomobildən 68-i yanmışdısa, bu göstərici elektromobildə cəmi 3,8-dir. 
Lakin elektromobilin mənfi cəhətləri də var. Bu texnikanın yanğın zamanı söndürülməsi böyük həcmdə su tələb edir. Ötən il ABŞ-də yanan Teslanı söndürmək üçün 170 ton su sərf edilmişdi. 
Köhnə avtomobillərin qəza zamanı alışma riski çox böyükdür. Yanacaq qaynar detalların üzərinə tökülərək alovlana bilər. Lakin elektromobildə zərbədən alışma ehtimalı yox həddindədir. 
Bir sözlə, elektromobillərin tez-tez alışması sosial şəbəkə yalanından o tərəfə keçmir.

Vüqar