“Eyni anda həm qripə, həm də koronavirusa yoluxma orqanizmə ciddi ziyan vura bilər”

Hər ötən gün koronovirusa yoluxma halı artır. Təəssüf ki bu, yaxşı hal deyil. 

Bu barədə Azərbaycanın Baş infeksionisti Təyyar Eyvazov məlumat verib.

O bildirib ki, hazırda ölkədə koronovirusla bağlı vəziyyət sirr deyil, ictimaiyyətə daim məlumat verilir:

“Biz görürük ki, son vaxtlar ölkədə koronavirusa yoluxmanın sayı artır. Təəssüf ki bu, arzuolunan hal deyil. Bu artımın bir səbəbi havaların soyuması, iqlim dəyişikliyidirsə, digər səbəblər insanlardan asılıdır. Cəmiyyətdə insanlar daha çox qapalı vəziyyətdədir və təmas artır.

Yoluxmanın artmasına səbəb insanların yaxın məsafədə bir-biri ilə təmasda olmasıdır. Qapalı məkanlarda havalandırma yoxdur və bu təhlükə riski yaradır. Gərək biz ilk olaraq özümüzü, bununla yanaşı ailəmizi, cəmiyyətin digər üzvlərini qorumuş oluruq”.

T.Eyvazov qrip əleyhinə pevyəndlərlə bağlı məqama da toxunub:

“Bəzi insanlar bu peyvəndləri dəstəkləmir, bəziləri isə bir qədər ehtiyat edir. İnsanların peyvəndlərə qarşı münasibəti fərqlidir, amma insanların çoxu qrip əleyhinə peyvəndi alqışlayır. Hər il respirator viruslar artır. Ona görə bu il qrip əleyhinə peyvəndlərin vurulması daha vacibdir. Respirator virusun bu mövsümdə daha çox yayılması gözlənilir. Yəni təsəvvür edin ki, biz həm qripə, həm də koronavirusa eyni və ya fərqli vaxtda yoluxa bilərəik. Nəticə etibarı ilə orqanizmin zədələnmə ehtimalı daha geniş ola bilər”.

“Peyvənd qrip əleyhinədir və onun vurulması bizim qrip olma ehtimalımızı aradan qaldıracaq. Bu da o deməkdir ki, əgər insan xəstələnsə birmənalı olaraq diqqət koronovirus və digər respirator ehtimallarına yönəldiləcək”, - deyə baş infeksionist qeyd edib.

Xatırladaq ki, ötən gün Azərbaycanda koronavirusa (COVID-19) 2259 yeni yoluxma faktı qeydə alınıb, 21 nəfər vəfat edib. COVID-19-a yoluxanlardan 1101 nəfər müalicə olunaraq sağalıb və evə buraxılıb.