Günəş-Yer xəttində güclü partlayış baş verdi

Bakı vaxtı ilə saat 11:40-da Günəşdə "X1.1" sinfinə aid yeni güclü partlayış qeydə alınıb.

Oxu.az xəbər verir ki, bu barədə Günəşin aktivliyi haqqında məlumat toplayan "XRAS" elmi platforması məlumat verib.

"Partlayış Günəşin şimal yarımkürəsində baş verib ki, bu da cari Günəş sikli üçün olduqca qeyri-adidir. Belə ki, indiyə qədər bütün aktivlik ekvatordan cənubda cəmləşmişdi", - deyə məlumatda bildirilir.

Partlayışın mərkəzi Günəş-Yer xətti üzərindədir. Buna baxmayaraq, geomaqnit vəziyyəti mülayim sabitdir. Maqnitosfer 12 avqustda baş verən güclü qasırğadan sonra demək olar ki, tamamilə bərpa olunub.

Günəşin aktivliyi ilə bağlı risklər 2-3 gün ərzində davam edəcək. Bu müddət başa çatdıqdan sonra aktiv Günəş mərkəzləri Yer üçün daha az təhlükəli zonalara keçəcək.

Tarixə nəzər salsaq, Günəş partlayışları keçmişdə də Yer üçün problemlər yaradıb. Məsələn, 1859-cu ildə baş verən "Carrington" hadisəsi teleqraf sistemlərini sıradan çıxarmışdı. Müasir dövrdə isə belə bir hadisə qlobal kommunikasiya və enerji infrastrukturuna ciddi ziyan vura bilər.