İmkanlı ruslar Avropaya bu yolla gedirlər

Vaxtilə deyirdilər ki, hər rus ömründə bir dəfə də olsa Parisi görmək arzusundadır. Lakin bu hər rusa qismət olmurdu. Müstəqil Rusiya vətəndaşları üçün bir neçə ay əvvələdək əlçatan olan Paris, Roma, Afina indi gedilməsi çətin olan şəhərlərdir.
Avtosfer.az xatırladır ki, Ukrayna münaqişəsi başlayandan Rusiyadan Avropaya təyyarə reysləri dayanıb. Bunun üçün Moskva və Peterburqda yaşayan imkanlı ruslar viza alıb üz tuturlar Finlandiyaya. Burada quru sərhədini keçən ruslar avtomobili aeroport qarajında qoyaraq təyyarə ilə başqa Avropa şəhərlərinə səyahət edirlər. Elə Helsinki aeroportunun qarajındakı Rusiya nömrəli Porsche və Mercedes də buna sübutdur.
Lakin bu da çox çəkməyəcək. 1 sentyabrdan etibarən Finlandiya da rusiyalılara turistik viza verilməsini kəskin şəkildə azaldacaq. Bundan sonra isə Avropaya getmək həyat tərzi deyil, lüks olacaq.

Vüqar Yaşaroğlu