![“Vasmoy”da qanunsuz parkinq : Vətəndaşlar səs-küyə görə şikayət edir - VİDEO](/upload/news/small/3627215.jpg)
İstanbulda hərəkət: kimə tıxac, kimə komfort - FOTO
![İstanbulda hərəkət: kimə tıxac, kimə komfort - FOTO](/upload/news/4382726.png)
Azərbaycan vətəndaşlarının ən çox səfər etdiyi istimqamətlərindən biri, bəlkə də birincisi İstanbuldur. Dil amili, əlçatanlıq və digər faktorlara görə azərbaycanlılar bu şəhərə axın edirlər.
İstanbula ilk dəfə yaraq basanların qarşılaşdıqları fenomen tıxaclardır. Əvvəlki Atatürk aeroportundan istifadə edərkən bu fenomen çox da ciddi deyildi. Metro (M1 xətti) ilə şəhərin mərkəzinə 40-45 dəqiqəyə çatmaq mümkün olurdu.
Yeni aeroporta (İstanbul Hava Limanı) isə taksi və ya şəxsi avtomobillə gedib gəlmək sözün həqiqi mənasında məşəqqətdir. Sutkanın istənilən saatında yolda intensivlik var. Avropanın ən çox təyyarə qəbul edən aeroportu istiqamətində belə sıxlıq tam təbiidir. İndi aeroporta M11 metro xətti xidmət edir və xəttin genişləndirilməsi davam edir.
Şəhərin içində isə, xüsusən də Avropa hissəsində intensivlik bütün Avropa ölkələrindən daha çoxdur. Kilometrlərlə uzanan tıxaclar heç kimə təəccüblü gəlmir. Tıxac istanbulluların gündəlik həyat normasına çevrilib. Amma...
Əhalinin müəyyən qismi üçün bu tıxaclar ciddi narahatlıq doğurmur. Söhbət tramvay, metrobus, metro və Marmaray (şəhərdaxili dəmir yolu xətti) istifadəçilərindən gedir. Bir qədər əvvələ qayıdaq.
2006-cı ildə metrobus xətləri tikilməyə başlayanda şəhər sakinləri etiraz etdilər: yolların metrobusa ayrılması şəhərin onsuz da yaxşı olmayan vəziyyətini daha da pisləşdirəcək. Eyni narazılıq metro və tramvay xətləri genişləndiriləndə də baş qaldırmışdı. Lakin bir-birini əvəz edən bələdiyyələr bu etirazlara məhəl qoymadı və nəticə də bəllidir.
İş yeri və evi metro, tramvay və metrobus üzərində olanlar üçün nəqliyyat tıxacı anlayışı yoxdur. Doğrudur, hər 3 ictimai nəqliyyat vasitəsində sıxlıq olur. Lakin sözügedən nəqliyyat vasitələrindən istifadə edənlər istədikləri yerə rahatlıqla gedə bilirlər.
Marmarayın istismara verilməsi ilə Avropa tərəfdən Asiyaya və əksinə keçidlər də asanlaşdı. Hər 2 yöndə əsrlərdir bərələr sərnişin daşımağa davam edir. Lakin gəmidən fərqli olaraq Marmaray iqlim şərtlərindən, boğazdan hansısa böyük gəminin keçidindən asılı deyil. Üstəgəl, sürət daha böyükdür.
Yuxarıda qeyd etdiyimiz məqamlarla yanaşı, Türkiyənin ən çox əhalisi olan şəhərində hərəkətin çətinlikləri də çoxdur. Avtobus və taksi ilə uzaq məsafəyə hərəkət çox vaxt aparır. Bu nəqliyyat növləri tıxacdan sığortalanmayıb. Eynilə fərdi avtomobillər kimi.
Yekun olaraq deyə bilərik ki, taksi və avtobus istisna olmaqla İstanbulda digər ictimai nəqliyyat növləri tıxacsız və kifayət qədər dəqiq hərəkət edə bilir. Müəyyən mənada İstanbulun ictimai nəqliyyat təcrübəsindən yararlanmaq mümkündür.
Vüqar Yaşaroğlu