Dünyaca məşhur milyarder, “Alibaba Group”un qurucusu Cek Manın yeri məlum olub. Çin Kommunist Partiyası ilə mübahisə etdikdən sonra yoxa çıxan Ma-nın hətta ölə biləcəyi də şayiələr arasında idi.

Avtosfer.az-ın xarici mediaya istinadən məlumatına görə, Ma iki il əvvəl Çin Kommunist Partiyası və onun lideri Si Cinpinlə fikir ayrılığı səbəbindən ölkəni tərk etməli olub.

O, Çinin maliyyə tənzimləmə sistemini tənqid edən çıxışından sonra 2020-ci ilin oktyabrından bəri görünmürdü.

“Financial Times” qəzeti Ma-nın yeri ilə bağlı məlumat paylaşıb.

Milyarderin son görüldüyü yerlərdən biri bu ilin iyul ayında Hollandiyanın “Wageningen” Universitetində onlayn tədbir olub.

Cek Ma təxminən altı aya yaxındır ki, Tokioda yaşayır. Ma-nın Tokioda daha adi bir həyat sürdüyü və daha çox bir neçə klubda ictimailəşdiyi bildirilib. O, ailəsi ilə birlikdə Yaponiyada vaxtını kənd və xizək kurortlarında keçirir.