Yaponiyada dünya tarixinə düşəcək dələduzluq baş verib.

Avtosfer.az xarici KİV-ə istinadən bildirir ki, dələduz kişi sosial şəbəkədə özünü rusiyalı kosmonavt kimi təqdim edərək, 65 yaşlı qadınla eşq macəraları yaşayıb. Qadın Yaponiyanın Şiqa əyalətində yaşayırmış. Dələduzluq edən kişinin sosial şəbəkə hesabı kosmosa aid fotolarla dolu olub və qadın da onun “kosmonavtam” sözünə inanıb.

Cütlüyün “sevgi macəraları” bu ilin iyul ayından oktyabr ayına qədər davam edib. Hətta o, cinayət əməlini yerinə yetirmək üçün romantikaya da yer ayırıb. Belə ki, o, qadına evlilik də söz verib. Danışıqların birində kişi qadına hazırda kosmosda olduğunu deyib. O, qadından Yer kürəsinə düşməsi üçün 30 min dollar (təxminən 51 min manat) pul istəyib. Qadın da dələduzun bu “ağlagəlməz” yalanına inanıb və istədiyi məbləği ona göndərib. Ancaq bu istək son olmayıb. Belə ki, dələduz kişi qadını aldadaraq, pul tələblərinə davam edib.

Sonradan aldandığını görən 65 yaşlı qadın polisə müraciət edib.