Olimpiya günü Fransanın dəmir yollarında hərəkət iflic olub

2024-cü il Paris Yay Olimpiya Oyunlarının açılışı günü Fransanın dəmir yolları ciddi insidentlə üzləşib. 

Avtosfer.az Fransa KİV-ə istinadla xəbər verir ki, gecə boyu bir çox xətdə ziyanvericilik aktları baş verib, dəmir yolu infrastrukturunda məqsədli şəkildə yanğınlar törədilib.
Fransa Dövlət Dəmir Yolları Şirkəti (SNCF) baş verən hadisələri məqsədyönlü sabotaj adlandırıb. Hadisə nəticəsində bir çox xətdə hərəkət ciddi şəkildə ləngiyib və ya tam dayanıb. 800 mindən çox sərnişin mənzil başına çata bilməyib. Beynəlxalq xətlərdə də ciddi gecikmələr müşahidə olunur.
Avropa ölkələrinin sakinləri Olimpiadaya gəlmək üçün əsasən yüksək sürətli qatarlardan istifadə edirlər. Lakin Fransa ərazisində onların demək olar hamısının hərəkəti dayanıb. 
SNCF bildirib ki, təmir işlərinə bütün heyət cəlb olunub. Lakin problemlərin tam aradan qaldırılması üçün azı 3 gün tələb olunur.

Vüqar Yaşaroğlu