Rusiyada da taksi xidməti bahalaşacaq – SƏBƏB 

Rusiyada  taksi ilə bağlı problemlər dərinləşir. Sanksiyaların tətbiqindən sonra Avropa istehsalı avtomobillərdən məhrum olan rusların bir problemi də maşını daha tez-tez dəyişmək zərurətidir. Səbəb yerli istehsal olan Çin modellərinin taksidə uzun müddət davam gətirməməsidir. Bu öz yerində.

Avtosfer.az xəbər verir ki, Rusiyada avtomobillə yanaşı ciddi sürücü qıtlığı da hökm sürür. Dumanın deputatı Oleq Qarinin fikrincə, ölkədə 72 min nəfər taksi sürücüsünə ehtiyac var. Üstəgəl, taksi xidməti üçün hər il 50 minədək yeni avtomobilə ehiyac duyulur. Ən əsası, son 2 ildə taksiçilərin xərcləri 60% artıb.
Sentyabrdan etibarən xidmətin yenidən bahalaşacağı qaçınılmazdır. Buna səbəb hökumətin taksi sərnişinlərinə məcburi sığorta tələbini gətirməsidir. Sığorta məbləği hələ konkretləşdirilməsə də, həm aqreqatorlar, həm də sürücülər qərardan narazıdır. 
Rusiya Taksi Sürücüləri Assosiasiyası bildirir ki, taksi sürücüsünün özünə müəyyən məbləğ qalması üçün 9 saatdan çox işləməlidir. O, 8-9 saata yalnız yanacaq, təmir və aqreqator haqqını qazana bilir. Sığorta tələbi də gətiriləcəyi təqdirdə sürücü heç bir qazanc əldə etməyəcək.
Statistika göstərir ki, Rusiya əhalisinin 10%-i həftədə azı 2 dəfə taksi xidmətindən istifadə edir.

Vüqar Yaşaroğlu