Sanksiya sevgiyə mane olmur, və ya hədər gedən milyonlar

 Bu günlərdə Rusiyada keçirilmiş rəy sorğusu maraqlı faktı aşkara çıxarıb. 

Avtosfer.az xəbər verir ki, sanksiyalara görə əlçatan olmasa da, ruslar yenə də Qərb texnikasını sevirlər. Son rəy sorğusuna görə, şimal qonşumuzda yenə də ən çox sevilən markalar Toyota, Mercedes və BMW-dir. Növbəti yerlərdə Kia, Nissan və digərləri gəlir. Əvvəlki illərdə olduğu kimi, bu dəfə də ilk onluqda heç bir Çin brendi yer almır. 

Rəyi soruşulanlar Çin modellərini yalnız məcburiyyətdən aldıqlarını etiraf ediblər. Onlar Toyota, Mercedes və BMW-nin satışlarının bərpa olunmasını arzulayırlar. 
Bu da bir daha göstərir ki, dövlət büdcəsindən milyonlarla vəsait alan solovyovlar, kiselyovlar reallığı görən insanların beynində “mənfur Qərb” obrazı yaratmağa müvəffəq olmayıblar. Efirdə gur səslə “dünyada ən təhlükəli maşın Mercedesdir”, “Toyota keyfiyyətinə görə Jiqulidən geri qalır” deyib boğaz yırtanlara qalan sosial şəbəkədə lağlağı obyektinə çevrilmək oldu.

Vüqar