Tarixi İstanbul tramvayı muzeyə verilir – SƏBƏB 

İstanbulun məşhur İstiqlal prospekinə baş çəkənlər şübhəsiz ki, qırmızı rəngli tramvay vaqonlarını görüb. İndi bələdiyyə bunları müasirləşdirmək istəyir. 

Avtosfer.az xəbər verir ki, 1990-cı ildə prospektdə nəqliyyatın hərəkəti qadağan edildikdən sonra Osmanlı dövlətinin yadigarı olan, tramvaylar da turistlərin ixtiyarına verildi. Tramvaylar bu gün də əcnəbi və yerli turistlərin maraq obyektidir. 

İstanbul bələdiyyəsi bu vaqonları muzeyə verməyi, kontakt xəttini isə sökməyi planlaşdırır. Layihəyə görə, vaqonlar xarici görünüşünü saxlamaqla yenisi ilə əvəzlənəcək. Lakin mexaniki hissə tam müasir olacaq. Artıq yeni tramvaylar elektromobil kimi akkumulyatorlardan qidalanacaq. Bir dolumla vaqonlar təxminən 2 gün hərəkət edə biləcək. Kontakt xəttinin sökülməsi həm də tramvaylardan bayraq asarkən hərəkəti asanlaşdırmaq məqsədi güdür. 

Yeni tramvaylarda təhlükəsizlik də ciddi nəzərə alınacaq. İndi güzgüləri kameralar əvəz edəcək, xaricdəki bütün çıxıntılar yığışdırılacaq ki, sərnişinlər vaqondan sallana bilməsin. Hər il onlarla turist tramvaydan sallandığı üçün yıxılıb xəsarət alır. 

Beləliklə, tam 110 il əvvəl istismara verilmiş vaqonlar yaxın vaxtlarda muzeydə öz yerini alacaq. İstanbulda həm klassik (türklər buna nostaljik tramvay deyirlər – müəl.), həm də müasir tramvaylar vəhdətdə işləyəcək.

Yeri gəlmişkən, Bosforun qoynundakı Osmanlının keçmiş paytaxında bu gün müasir tramvaylar da özünün inkişaf dövrünü yaşayır. Bu bir daha göstərir ki, qədim, dar küçələri olan meqapolislərdə də relsli küçə nəqliyyatının inkişafı mümkündür.

Vüqar