![Bakıdakı yataqxanada rütubətdən ağac bitib: Qurumlardan reaksiya yoxdur - FOTO](/upload/news/small/2346349.png)
Televizor ustaları ilə avtobus təmirçilərini birləşdirən dəyər - FOTO
![Televizor ustaları ilə avtobus təmirçilərini birləşdirən dəyər - FOTO](/upload/news/2165.png)
Bakıda nasaz avtobusların istismara buraxılması heç kimə sirr deyil. Qapısı bağlanmayan, mühərrik və ya transmissiyasından əcaib səslər gələn avtobusların dəfələrlə sərnişini olmuşuq.
Avqustun 23-də saat 10 radələrində rastlaşdığım hadisənin bənzəri barədə bir müddət əvvəl məlumat vermişdim. O vaxt “Bakubus”un avtobusunun mühərrik bölməsinin salondakı qapağında 8 boltdan cəmi üçünün yerində olduğunu yazmışdım.
Bu dəfə isə 206 saylı marşrutdakı avtobusda (Elmlər Akademiyası - Lökbatan) daha ağır vəziyyətin şahidi olduq. Bakı Dairəvi yolunda tam sürətlə hərəkət edərkən 90 XV 354 nömrə nişanlı avtobusda ötürmələr qutusunun üstündəki qapaq küləyin təsiri ilə yerindən çıxdı. Mühərrikdən istilik və işlənmiş qazlar da salona doldu. Doörudur, qapağı yerinə sala bildim və avtobusun sürəti azaldıqda vəziyyət normallaşdı. Yan oturacaqdakı gənc qızın isə hisslərini sözlə təsəvvür etmək mümkün deyil.
Bu vəziyyətə hansısa sovet avtomobilindəki kimi istehsal qüsuru adı vermək mümkün deyil. Problemin kökü budur ki, qapağın üzərindəki 4 ədəd boltu hər dəfə açmamaq üçün çilingərlər və ya sürücü onları təkrarən yerinə bağlamır. Bununla bir növ gələcək işlərini yüngülləşdirirlər.
Bəs bu boltların yerində olmaması nəticəsində sərnişinin ayağı hansısa fırlanan detalın üzərinə düşsə nə baş verəcək? Vəziyyəti təsəvvür etmək belə dəhşətlidir.
Əslində bu hadisə yenilik deyil, ənənənin başqa formada davamıdır. Sovet dövründə bir çox televizor ustası lampalı televizorları təmir edərkən çox sayda detalı “artıq” hesab edərək yerinə qaytarmırdılar. Buna səbəb qeyri-peşəkarlıq idi.
İndi də onların nəvələri iş başındadır. Amma televizor təmiri atelyelərində yox, avtobus qarajlarında.
Vüqar Yaşaroğlu