Xaricə işləyən yük avtomobilləri qadınlara həvalə ediləcək - FOTO

Ukraynada müharibə uzandıqca ölkəni tərk edən kişilərin də sayı artır. Ölkədən qaçma yolları da müxtəlifdir. 

Avtosfer.az xəbər verir ki, Ukraynada 18-60 yaş arası kişilərin ölkədən çıxışına qadağa qoyulub. Lakin bəzi peşə sahiblərinə, xüsusən də sürücülərə güzəştlər edilir. Bir neçə nəqliyyat şirkəti sürücüləri bronlaşdırdığı üçün xariclə (hələlik) problemsiz işləyir. Amma əksər şirkətlər sürücüləri müqaviləsiz, bronsuz işlətdiyi üçün (başlıca səbəb vergidən yayınmaqdır – müəl.) onların sərhədi keçməklə bağlı ciddi problemləri var. Üstəgəl, mayın 18-də qəbul edilmiş qanuna görə bütün kişilər hərbi komissarlığa gələrək məlumatlarını dəqiqşləşdirməlidir. Qırılma nöqtəsi də məhz bu olub.
Məsələdən xəbər tutan onlarla sürücü avtomobili xaricdə ataraq qaçıb. Təkcə bir iş adamının Polşada 25 refrijeratoru və 8 yanacaqdaşıyan avtomobili qalıb. Halbuki yanacaqdaşıyan maşına ordunun çox böyük ehtiyacı var.
Hazırda Ukraynaya yanacağın cəmi 15%-i xaricdən avtomobillə daşındığı üçün idxalda ciddi problem yoxdur. Lakin sıxılmış təbii qazın təxminən yarısı yük avtomobilləri ilə daşınır və ciddi sürücü qıtlığı hiss olunur. Ölkə daxilində isə sürücülük vəsiqəsi olanlar kütləvi şəkildə ordu sıralarına çağırılır. Döyüşən orduda sürücüyə hər zaman ehtiyac var. Bəs çıxış yolu nədir? 
Qeyri-rəsmi məlumatlara görə artıq Avropanın avtomobil şirkətlərindən birinin Kiyevdəki nümayəndəliyi qadınlar üçün yük avtomobilləri sürücülüyü kursu açıb. Sərhəddən kənara yükləri zərif cinsin nümayəndələri daşıyacaqlar.

Vüqar Yaşaroğlu