Bakıda “EmalArtXana” yaradıcı icması fəaliyyətə başladı - FOTOLAR

Bakıda yeni yaradıcı təşəbbüs – EmalArtXana (EAX) fəaliyyətə başlayıb. Layihə müxtəlif sahələrdən olan insanları bir araya gətirərək, sənət, ünsiyyət və ortaq yaradıcılıq üçün açıq və səmimi bir mühit formalaşdırmağı hədəfləyir.

EmalArtXana-nın yaranması insanların gündəlik həyatın sürətli ritmindən kənara çıxaraq, özlərini daha sərbəst ifadə edə biləcəkləri, fikirlərini bölüşə biləcəkləri və yeni baxış bucaqları qazana biləcəkləri bir məkana olan ehtiyacdan doğub. Burada əsas diqqət yalnız nəticəyə deyil, prosesin özünə — birgə düşünməyə, yaratmağa və paylaşmağa yönəlir.

Layihənin əsas fərqi yanaşmasındadır. EAX-da standart və hər yerdə rast gəlinən master-klasslardan uzaq durularaq, daha çox eksperimental və qeyri-adi yaradıcı formatlara üstünlük verilir.

Proqrama kumihimo (yapon ip hörmə texnikası), makrame, eləcə də köhnə kitabların art obyektlərə çevrildiyi “recycle art” master-klassları daxildir. Bu istiqamətlər Azərbaycanda geniş yayılmamış yanaşmaları təqdim edərək iştirakçıları yalnız yeni bacarıqlar qazanmağa deyil, eyni zamanda fərqli düşünməyə və öz yaradıcılıq sərhədlərini genişləndirməyə sövq edir.

EmalArtXana-nın əsas məqsədi yaradıcı ifadəni əlçatan etmək, yeni tanışlıqlar və əməkdaşlıqlar üçün körpü rolunu oynamaq və müxtəlif təcrübələrə malik insanları ortaq dəyərlər ətrafında birləşdirməkdir. Layihə xüsusilə özünü sınamaq, yeni bacarıqlar qazanmaq və ya sadəcə yaradıcı mühitdə vaxt keçirmək istəyən hər kəs üçün açıqdır.

Layihənin təsisçisi Toğrul Cəfərli bildirdi ki, EmalArtXana-da əsas olan yalnız ortaya çıxan iş deyil, həmin işin yaranma prosesidir. “İnsanlar burada bir-birindən öyrənir, ilham alır və özlərini daha rahat ifadə etməyə başlayırlar. Məqsədimiz bu mühiti qoruyaraq daha çox insan üçün əlçatan etməkdir."

Qısa müddətdə maraqla qarşılanan təşəbbüs yaxın gələcəkdə fəaliyyətini genişləndirməyi, yeni əməkdaşlıqlar qurmağı və daha geniş auditoriyanı əhatə etməyi planlaşdırır.

Qeyd edək ki, EmalArtXana fərdi iştirakçılar, universitetlər və müxtəlif qurumlarla əməkdaşlığa açıqdır. Maraqlanan tərəflər layihəyə qoşularaq, birgə təşəbbüslər və dəstək vasitəsilə bu mühitin inkişafına töhfə verə bilərlər.

Əlavə məlumat üçün:
+994 55 500 33 95