Bakıda sakinlərin diqqəti nəticəsində ağac “daş qəfəs”dən azad olundu - FOTO

Binəqədi rayonu, Svetlana Məmmədova küçəsində şam ağacının dibi tametlə örtülüb.

Bu barədə fotolar sosial şəbəkələrdə yayılıb. 

Bildirilib ki, susuz qalan ağac bir müddət sonra quruyacaq, şəhər isə kölgəsiz və oksigensiz qalacaq. Obyekt sahibləri isə növbəti parkovka yeri qazanacaq.

Məsələ barədə Ekologiya və Təbii Sərvətlər Nazirliyi ilə əlaqə saxladıq. 

Dövlət Ekoloji Təhlükəsizlik Xidmətinin rəsmisi Vaqif Cavadov Oxu.Az-ın sorğusuna cavab olaraq bildirilib ki, Binəqədi rayonu, 6-cı mikrorayon, Svetlana Məmmədova küçəsində ağacın dibinə daş döşənməsi ilə bağlı Xidmətə daxil olan şikayət araşdırılıb:

“Fakt təsdiqini tapıb. Əməkdaşlarımızın nəzarəti altında 79 saylı Mənzil Kommunal İstismar Sahəsinin işçiləri tərəfindən sözügedən ağacın dibi daş döşəmədən təmizlənib və ona aqrotexniki xidmət göstərilib”.