Binəqədi rayonunda yol təmir olunsa da, yenidən yararsız vəziyyətə düşüb.

Bu barədə görüntülər sosial şəbəkələrdə yayılıb. 

Bildirilib ki, üç aydır yararsız vəziyyətdə olan yolla bağlı aidiyyəti qurumlara müraciət edilsə də, məsələ həllin tapmır. 

Məsələ barədə Azərbaycan Avtomobil Yolları Dövlət Agentliyi ilə əlaqə saxladıq.

Qurumun mətbuat xidmətinin rəhbəri Anar Nəcəfli saytımıza açıqlamasında bildirib ki, yolun vəziyyəti ilə bağlı ötən həftədən məlumatlıdırlar:

“Azərsu” ASC-nin Binəqədi Sukanal idarəsinə məlumat verilib ki, qəza aradan qaldırılsın və qazılacaq hissədə yol bərpa olunsun”.

O qeyd edib ki, sözügedən yolda heç bir problem yoxdur:

“Sadəcə qəza olub və aradan qaldırılacaq”.

“Azərsu” ASC-dən isə bildirilib ki, ərazidən keçən 280 millimetr diametrli xətdə qəza baş verib:

“Qəzanın aradan qaldırılması üçün Azərbaycan Avtomobil Yolları Dövlət Agentliyinə müraciət olunub və icazə alınıb. Qəzanın aradan qaldırılması işlərinə başlanılır”.

ASC-dən qeyd edilib ki, ərazidə vətəndaşın iddia etdiyi kimi kanalizasiya suları axmayıb, sadəcə su xəttində qəza baş verib.