"Baku Bus"un bu avtobusunda lüzumsuz sürət limiti qoyulub - SƏBƏB?

Dünyada yollarda sürət limitinin tarixi elə ilk avtomobilin tarixi qədərdir. Lakin avtomobillərə sürət limitinin tətbiqi nisbətən sonraya, 60-cı illərə təsadüf edir. Əgər bunun üçün 20-ci əsrdə mexaniki olaraq karbüratorun drossel qapağının açılması məhdudlaşdırılırdısa, 21-ci əsrdə bunu elektron sistemlə tənzimləyirlər. qayıdaq mətləbə.
Bakının ən təhlükəli yollarından biri Xocəsən şosesidir. Metro stansiyasından Meyvəli bazarınadək yoldan asılı olaraq 40-80 km/saat arası sürət limiti tətbiq edilir. Polisin tətbiq etdiyi bu limit normaldır və bununla bağlı heç bir iradımız yoxdur. Əsas məsələ Bakubus avtobuslarına tətbiq edilən limitdir. 

Bakubus avtobuslarında məhdudlaşdırıcı tətbiq edildiyi üçün maksimal sürət saatda 50 kilometri aşmır. Şəhər daxilində bu hardasa başadüşüləndir. Amma bu limit metronun 20 Yanvar stansiyasını Lökbatanla birləşdirən 130 saylı marşrutun fəaliyyətinə mane olur. 80 km/saat limi olan hissədə 40-50 km/saat sürətlə gedən,daha doğrusu sürünən avtobus həm digər iştirakçılara mane olur, həm də sərnişinlərin mənzil başına çatmasını gecikdirir. Avtobusların bu hissədə 70 km/saat sürətlə hərəkət etməsi ciddi təhülkə yaratmamaqla yanaşı, marşrutun iş keyfiyyətini də artırar. Eyni zamanda yolun buraxıcılıq qabiliyyəti də artar.

Vüqar Yaşaroğlu