Beynəlxalq axtarışda olan şəxs Azərbaycan tərəfindən Gürcüstana təhvil verilib

Milli qanunvericiliyin və tərəfdar çıxdığımız beynəlxalq müqavilələrin, o cümlədən “Mülki, ailə və cinayət işləri üzrə hüquqi yardım və hüquqi münasibətlər haqqında” Minsk Konvensiyasının tələblərinə əsasən Gürcüstan Baş Prokurorluğunun Azərbaycan Respublikası Baş Prokurorluğu ilə ikitərəfli münasibətlər çərçivəsində Gürcüstan ərazisində cinayət törətmiş şəxsin cinayət məsuliyyətinə cəlb edilməsindən ötrü Gürcüstanın hüquq mühafizə orqanlarına təhvil verilməsi barədə Azərbaycanın Baş Prokurorluğuna sorğu daxil olub.

Baş Prokurorluğun mətbuat xidmətindən bildiriblər ki, Gürcüstan vətəndaşı, Gürcüstan Cinayət Məcəlləsinin 276-cı maddəsinin 7-ci hissəsi (iki və daha çox şəxsin ölümünə səbəb olan yol hərəkəti və nəqliyyat vasitələrinin istismarı qaydalarının pozulması) ilə təqsirləndirilən Əliyev İlyas Qəzənfər oğlunun 2018-ci il mayın 23-də bu ölkənin Marneuli şəhərindən Bolnisi şəhərinə gedən yolda idarə etdiyi nəqliyyat vasitəsinin istismarı qaydasını pozması səbəbindən yol-nəqliyyat hadisəsi törətməsi nəticəsində iki şəxsin ölümünə səbəb olmasına əsaslı şübhələr müəyyən edilib.

Rustavi şəhər məhkəməsinin 2020-ci il 17 dekabr tarixli hökmü ilə İlyas Əliyev 8 il azadlıqdan məhrumetmə cəzasına məhkum edilib.

İlyas Əliyev barəsində beynəlxalq axtarış elan olunub. Axtarışda olan şəxsin yerinin müəyyənləşdirilməsi əsası ilə Gürcüstan Baş Prokurorluğunun Azərbaycan Respublikasının Baş Prokurorluğuna etdiyi sorğular təmin edilməklə İlyas Əliyev 2021-ci il aprelin 15-də Ədliyyə Nazirliyinin Penitensiar Xidmətinin xüsusi konvoyunun müşayiəti ilə Gürcüstanın hüquq mühafizə orqanlarına təhvil verilib.