"Boeing" təyyarə qəzaları ilə bağlı günahını etiraf etdi

"Boeing” 2018-2019-cu illərdə 346 nəfərin ölümünə səbəb olan iki 737 MAX qəzası ilə əlaqədar fırıldaqçılıqda günahını etiraf edib və 243,6 milyon dollar cərimə ödəyəcək.

Bu barədə Qaynarinfo "Reuters”ə istinadən xəbər verir.

Barışıq sazişi "Boeing”in mühakimə olunmasını və daha ağır maliyyə nəticələri ilə üzləşməsini tələb edən qurbanların ailələrinin kəskin tənqidinə səbəb olub.

ABŞ Ədliyyə Nazirliyinin "Boeing”ə qarşı ittihamlar irəli sürmək cəhdləri, yanvar ayında uçuş zamanı partlayışından sonra təyyarə istehsalı müəssisəsində davamlı təhlükəsizlik və keyfiyyət problemlərini ortaya qoyduqdan sonra şirkəti bürüyən böhranı dərinləşdirib.

Günahın etirafı şirkətin, xüsusən də ABŞ Müdafiə Nazirliyi və NASA ilə gəlirli dövlət müqavilələri qazanmaq qabiliyyətini potensial olaraq təhdid edir.

"Boeing” sözçüsü şirkətin Ədliyyə Nazirliyi ilə razılaşmanın şərtlərilə bağlı prinsipial razılığa gəldiyini təsdiqləyib. Sazişin bir hissəsi olaraq, təyyarə istehsalçısı təhlükəsizlik proqramlarını gücləndirmək və tənzimləyici tələblərə riayət etmək üçün növbəti üç il ərzində ən azı 455 milyon dollar xərcləməyə razılaşıb.

"Boeing”in direktorlar şurası təyyarə qəzalarında həlak olanların yaxınları ilə görüşəcək.

Saziş şirkətin qanuni tələblərə uyğunluğunu izləmək üçün illik tərəqqi hesabatlarını açıq şəkildə təqdim etməli olan müstəqil müşahidəçinin təyin edilməsini də nəzərdə tutur. "Boeing” müşahidəçinin üç illik iş müddəti ərzində sınaq müddətində olacaq.