“Boeing”də dərinləşən maliyyə böhranı

Dünyanın 2 əsas təyyarə istehsalıçından biri olan Boeing üçün çətin günlər davam edir. Şirkətin bu gün açıqladığı maliyyə hesabatı vəziyyətin düşünüldüyündən daha ağır olduğunu göstərir. Şirkət əməkdaşlarının artıq ikinci aya qədəm qoyan tətilə görə müştərilərə hazır məhsul çatdırılması dayanıb. Yeni rəhbərlik çıxış yolu kimi işçi sayını azaltmağı planlaşdırır.  

Avtosfer.az xəbər verir ki, sonuncu maliyyə hesabatı “Boeing” şirkətinin vəziyyətinin ürəkaçan olmadığını göstərir. Üçüncü rüb son 4 ildə şirkətin maliyyə baxımından ən pis dövrü olub. Sözügedən dövrdə təyyarə istehsalçısının xalis zərəri 6,1 milyard dollar təşkil edib. 2020-ci ilin yanvarından indiyədək şirkətin zərəri 31 milyard dolları ötüb.

Şirkətin yeni rəhbərliyi vəziyyətdən çıxış yolu olaraq işçi sayını 10 faiz azaltmaq istəyir. 2024-cü ilin yanvarına olan məlumata görə şirkətin dünya üzrıə  171 min nəfər əməkdaşı var.

“Boeing”in əməkdaşlarının əsas zavodlarda başlayan tətili artıq ikinci aya qədəm qoyub. Həmkarlar təşkilatları ilə davam edən danışıqlar hələ ki heç bir nəticə vermir. İşçilər inflyasiyaya uyğunlaşmaq üçün əmək haqqının yaxın 3 ildə 40% artırmağı tələb edirlər. Şirkət rəhbərliyi 35% artım təklif edir. 
Etiraz aksiyaları şirkətin sifarişləri də vaxtında çatdırmasına mae olur. Sentyabrın 13-də tətil başlayanadək 33 hava gəmisi müştərilərə çatdırılıb. Sonrakı dövrdə isə heç bir çatdırılma olmayıb. Qaydaya görə malın dəyərinin 60%-i təhvil-təslimdən sonra ödənildiyi üçün bu gecikmələr şirkətin maliyyə böhranını dərinləşdirir. Son illərdə baş verən qəzalar və dövlət sifarişlərinin azalması şirkətin gəlirlərinin ciddi şəkildə azalması ilə nəticələnib.

Vüqar