“Google”un axtarış alqoritmləri internetə sızıb

“Google” axtarış xidmətinin işləyişini təsvir edən təxminən 2,5 min səhifəlik sənəd internetə sızıb. “Report” xəbər verir ki, bu barədə “Verge” portalı məlumat yayıb.

İnternetdə aşkarlanan daxili sənədlərdə “Google”un topladığı və istifadə etdiyi verilənlər növləri haqqında məlumat var. Sənədlər həmçinin axtarış sisteminin kiçik saytlarla bağlı siyasəti, eləcə də “Google”un prezident seçkiləri kimi həssas mövzular üzrə sorğuları idarə etməsi haqqında məlumat verir. Nəşr qeyd edib ki, bu “misli görünməmiş” sızma “Google”un axtarış sisteminin işi ilə bağlı açıqlamalarında “heç də tam dürüst olmadığını” düşünməyə əsas verir. “Google”un sözçüsü Devis Tompson “Verge”ə sızmanın baş verdiyini təsdiqləsə də, dərc olunmuş “məlumatların kontekstdən çıxarıldığını, köhnə və ya natamam məlumatlara əsaslandığını” iddia edib.