Narkotik vasitələrin və psixotrop maddələrin qanunsuz dövriyyəsində təqsirləndirilən 4 qardaş - Rəsul, Vidadi, Xəlil və Fizuli İbraimovların cinayət işi üzrə ibtidai istintaq başa çatıb.

Avtosfer.az-ın xəbərinə görə, iş baxılması üçün Lənkəran Ağır Cinayətlər Məhkəməsinə göndərilib.

Cinayət işi hakim İlkin Abdullayevin icraatına verilib.

Məhkəmənin hazırlıq iclasının vaxtı hələlik məlum deyil.

Qeyd edək ki, ötən il Daxili İşlər Nazirliyinin yaydığı məlumata əsasən, Lənkəranda narkotik vasitə ilə tutulan F.İbrahimovun ətrafında Baş Narkotiklərlə Mübarizə İdarəsinin Cənub Bölgəsində Regional Şöbəsinin əməkdaşları tərəfindən aparılan əməliyyat tədbirləri ilə onun 3 qardaşının evlərində narkotik vasitə saxlamaları da müəyyən edilib.

Əməliyyat-axtarış tədbirləri ilə F.İbrahimovun qardaşları Xəlilin evindən 89 qrama yaxın metamfetamin, Rəsulun evindən 805 qramdan artıq heroin, Vidadinin evindən isə 235 qramdan artıq tiryək və 580 qram marixuana aşkar edilərək götürülüb.