Süveyş kanalında “Ever Given” quru yük gəmisinin saya oturması üzündən bir neçə gün ərzində iflic olmuş hərəkət bərpa edilib.

Avtosfer.az “Al Arabiya”ya istinadən xəbər verir ki, bu barədə Misir prezidenti Əbdülfəttah əl-Sisi bildirib.

Gəminin qəzasına dair məsələlərin texniki ekspertlər tərəfindən ətraflı araşdırılacağını deyən dövlət başçısı bu işə şəxsən müdaxilə etməyəcəyini dilə gətirib.

Qeyd edək ki, uzunluğu 400 metr olan “Ever Given” yük gəmisinin yükgötürmə qabiliyyəti 224 min tona bərabərdir. Gəmi Çindən Niderlanda doğru hərəkət edirkən kanalın 151-ci kilometrliyində saya oturub. Dünən “İnchcape Shipping” şirkəti gəmini saydan çıxardıqlarını açıqlayıb.