Önü qaldırılan "Niva"nın sürücüsü şəhərdə özünə klip çəkdirdi - VİDEO

Yenə burnu göydə gedən «Niva»lardan biri Bakı küçələrində şou göstərib. Avtomobilin görünüşünü dəyişməyi azmış kimi sürücü video klipini də hazırlayıb sosial mediyada paylaşıb. 
Avtosfer.az bildirir ki, 10-SE-808 nömrə nişanli «Niva» markalı avtomobilin sürücüsü qaydalara uyğun olmayacaq şəkildə avtomobilinin ön hissəsini «şaxə» qaldırıb. Avtomobildə bu cur dəyişikliklər etmək qanunvericiliyə uyğun gəlmədiyi üçün bəzi cərimələr tətbiq edilir.
Amma, məsələ bundadır ki, belə avtomobillərin sürücüləri cərimələrdən qorxmayacaq dərəcədə gövdə göstərişi etməyi sevirlər. Bundan hansı zövqü alırlar, nədi onları buna sövq edən anlamaq mümkün deyil. Əgər belləri ağrıdığından avtomobilin qabağını qaldırlarsa ki, arxaya yaxşı söykənə bilsinlər, o zaman sadəcə bellərinin arxasına kiçik döşəkçə qoysalar məsələ həll olar. İşin zarafat qismi bir yana, önü qaldırılan avtomobildə sürücünün qarşısını görməsi çətinləşir, balaca bir uşaq yola qaçsa onu görmədən əzib keçmək ehtimalı çox yüksəkdir. Bundan başqa önü qaldırılan avtomobillərin arxa körpüsünə ağırlıq düşdüyündən o, tez sıradan çıxır, sürətlər qutusunun fəaliyyəti zəifləyir, əyləcə və əyləc məsafəsinə də mənfi təsir göstərir.
 Önü yuxarıda olan maşında əyləşənlər özlərini göyün yeddinci qatında hiss edirlərsə, acı bir həqiqət deyək, siz yerdəsiz, heç bir yana qalxmamısınız. Əyləşdiyiniz də təyyarə deyil, sadəcə «Niva»dır.    

Aysel