Şəhid Araz Seyfullayevin anım günüdür
Bu gün şəhid Araz Seyfullayevin anım günüdür.
Avtosfer.az xəbər verir ki, Araz Elsevər oğlu Seyfullayev Vətən müharibəsində Füzuli və Cəbrayıl rayonları uğrunda gedən döyüşlərdə iştirak edərək şəhidlik zirvəsinə ucalıb.
Şəhidin nəşi 8 oktyabr 2020-ci il tarixində doğulduğu Masallı şəhər Digah qəbiristanlığında izdihamla torpağa tapşırılıb.
Qeyd edək ki, o, 28 may 2001-ci ildə Masallı şəhərində anadan olub. 2007-ci ildə Sakit Tağıyev adına Masallı şəhər 4 nömrəli tam orta məktəbinin birinci sinfinə daxil olub və 2018-ci ildə həmin məktəbi bitirib.
2019-cu ilin iyul ayında çağırışçı kimi hərbi xidmətə yollanıb. Hərbi xidmətini Azərbaycan Silahlı Qüvvələrinin Göytəpə şəhərinin, “N” saylı hərbi hissəsində davam etdirib və 2019-cu ilin oktyabr ayının əvvəlindən Xüsusi Təyinatlı Qüvvələrə qatılıb.
A. Seyfullayev ölümündən sonra “Vətən uğrunda”, “Cəsur döyüşçü”, “Füzulinin azad olunmasına görə” medalları və “Azərbaycan Bayrağı” ordeni ilə təltif edilib.
(qafqazinfo)