Türkiyədə göyərtəsində ukraynalılar olan gəmi saxlanılıb

Türkiyədə göyərtəsində Ukrayna vətəndaşları olan gəmi saxlanılıb. Bunu Ukraynanın Xarici İşlər Nazirliyinin mətbuat katibi Oleq Nikolenko açıqlayıb. Onun sözlərinə görə, göyərtədə olan şəxslərdən 4-ü həbs olunub. Onlar narkotik qaçaqmalçılığında təqsirli bilinirlər.

İnsident iyulun 10-u İskenderun limanında baş verib. “MSC CAPUCİNE R” adlı gəmi Liberiya bayrağı altında hərəkət edib.

Məlumata əsasən, ümumilikdə gəminin göyərtəsində 25 ekipaj üzvü olub. Onlardan 24-ü ukraynalıdır. Həbs olunan şəxslər gəminin kapitanı və onun 3 köməkçisidir. Bununla yanaşı, Ukrayna səfirliyi saxlanılan şəxsləri lazımi sənədlər, vəkil və tərcüməçi ilə təmin edib. Ekipajın digər üzvləri gəmidə qalıb və məsələ ilə bağlı şahid qismində çıxış edirlər.