Türkiyə təyyarə qəzası ilə bağlı araşdırma qrupu göndərir

“Azərbaycan Hava Yolları”na aid sərnişin təyyarəsinin Qazaxıstanın Aktau şəhərində qəzaya uğraması ilə bağlı Azərbaycan Dövlət Mülki Aviasiya Agentliyinin müraciəti əsasında qəzanın səbəblərinin araşdırılması, texniki və əməliyyat analizlərinin aparılması və lazımi dəstəyi təmin etmək üçün 8 nəfərdən ibarət istintaq komissiyası təyin edilib”.

Avtosfer.az xəbər verir ki, bunu Türkiyənin nəqliyyat və infrastruktur naziri Abdulkadir Uraloğlu “X”-də yazıb.

Onun sözlərinə görə, nümayəndə heyəti bu gün axşam saatlarında Bakıya yola düşəcək və sabahdan etibarən öz təcrübə sahələrinə uyğun olaraq insidentin bütün aspektlərini araşdırmaq üçün Azərbaycanın hakimiyyət orqanları ilə koordinasiyalı işləyəcək.

“Türkiyə olaraq hər şəraitdə Azərbaycanın yanında olduğumuzu bildirir, həyatını itirənlərə Allahdan rəhmət, azərbaycanlı qardaşlarımıza şəfa diləyirik”, - nazir qeyd edib.