"Bakı Metropoliteni" QSC-nin xidmətindən pulsuz istifadə etmək istəyənlərin sayı artıb.

Avtosfer.az-ın məlumatına görə, Vətən müharibəsində iştirak edərək yaralanmış şəxslər, eləcə də həyatını itirmiş şəxslərin ailə üzvləri metro məsələsində güzəştli kateqoriyaya aid edilmələrini istəyirlər.

Hələ ki, bununla bağlı qərar yoxdur. Amma sözügedən şəxslərin bəzən metroya pulsuz minməyə cəhd etməsi halları olur. Bu da onlarla metro işçiləri arasında kiçik münaqişə yaradır.

Bununla bağlı "Report"un sorğusuna cavab olaraq “Bakı Metropoliteni”ndən bildirilib ki, ödənişsiz istifadə hüququ olan sərnişinlərin əhatə dairəsi və bu hüququn əsasları qanunvericiliklə müəyyən edilib:

Nazirlər Kabinetinin 19 oktyabr 2010-cu il tarixli qərarı ilə təsdiq edilmiş “Bakı Metropolitenindən İstifadə Qaydaları”nın 2.1-ci bəndinin tələbinə görə sərnişinlər metropolitenin buraxılış mənətəqəsindən daxil olarkən gediş haqqı ödəməli və ya ödənişsiz keçid hüququ verən sənədi açıq şəkildə təqdim etməlidirlər.

Həmin şəxslərin siyahısı belədir.

- 7 yaşına qədər uşaqlar - Nazirlər Kabinetinin 19 oktyabr 2010-cu il tarixli 179 nömrəli qərarı ilə təsdiq edilmiş “Bakı Metropolitenindən İstifadə Qaydaları”nın 4.1.1-ci bəndinə əsasən sərnişinlər 7 yaşınadək uşaqlara görə gediş haqqı ödəməmək hüququna malikdirlər;

- xidməti vəzifələrinin icrası zamanı polis əməkdaşları - “Polis haqqında” qanunun 38-ci maddəsinin IV hissəsinə əsasən xidməti vəzifələrinin icrası zamanı polis əməkdaşları ölkə ərazisində sərnişin nəqliyyatının bütün növlərindən (taksidən və şəhərlərarası nəqliyyatdan başqa) pulsuz istifadə etmək hüququna malikdirlər;

- müddətli həqiqi hərbi xidmət hərbi qulluqçuları - “Hərbi qulluqçuların statusu haqqında” 25 dekabr 1991-ci il tarixli 36 nömrəli qanunun 6-cı maddəsinə görə müddətli həqiqi hərbi xidmət hərbi qulluqçuları sərnişin nəqliyyatının bütün növlərindən (taksidən başqa) pulsuz istifadə edirlər. 3 oktyabr 1997-ci il tarixli, 377-IQ nömrəli qanunla təsdiq edilmiş “Hərbi xidmətkeçmə haqqında” Əsanamənin 4-cü bəndinə, “Hərbi vəzifə və hərbi xidmət haqqında” 23 dekabr 2011-ci il tarixli 274-IVQ nömrəli qanunun 28.2-ci maddəsinə görə müddətli həqiqi hərbi xidmət keçən hərbi qulluqçulara qanunla müəyyən edilmiş müddətlər daxilində həqiqi hərbi xidmət keçən əsgərlər, matroslar və çavuşlar aiddirlər.

Güzəştlərin tətbiq edilməsini müəyyən edən hüquqi-normativ sənədlərin qəbulu, onlarda əlavə və dəyişikliklərin edilməsi “Bakı Metropoliteni”nin səlahiyyətlərinə daxil deyil. Metro nəqliyyatında sərnişindaşıma funksiyalarının təşkili və tənzimlənməsini həyata keçirən müəssisə kimi “Bakı Metropoliteni” qeyd edilən normativ-hüquqi aktların icrasını təmin edir.