Yol nişanı olmayan yerdə maşın saxlayan həvəskar balıqçılar maarifləndirildi

Su Nəqliyyatında Polis İdarəsinin əməkdaşları Kənd Təsərrüfatı Nazirliyinin Balıqçılıq və Akvakultura Mərkəzi ilə birgə Səbail rayonu, Şıxov çimərliyi ərazisində həvəskar balıqçılar üçün maarifləndirici tədbir təşkil edib.

Avtosfer.az xəbər verir ki, monitorinqlər zamanı vətəndaşlarla söhbətlər aparılıb, yol nişanı olmayan ərazilərdə və dağ yamaclarının altında avtomobillərin saxlanmasının, eləcə də piyada keçidi olmayan yerlərdən yolun keçilməsinin təhlükəli olduğu diqqətə çatdırılıb. Qeyd olunub ki, bu cür hallar həm sürücülər, həm də piyadalar üçün ciddi risk yaradır.

Eyni zamanda, küləkli hava şəraitində Xəzər dənizinin qayalıq sahələrində balıq ovunun həyati təhlükə yaratdığı vurğulanıb. Həvəskar balıqçılara yalnız xüsusi ayrılmış ərazilərdə balıq tutmağın vacibliyi bildirilib.

Vətəndaşlara Nazirlər Kabinetinin qərarına əsasən 1 may 2026-cı il tarixindən etibarən balıq ovu mövsümünün dayandırılacağı barədə də məlumat verilib.

Bu istiqamətdə profilaktik və maarifləndirici tədbirlərin davam etdirildiyi qeyd olunur.