Zəngilanda 200 ev tikilir - VİDEO

Azərbaycanda ilk "Ağıllı kənd" layihəsi uğurla icra  edilir. Ermənilərin işğalçılıq siyasəti nəticəsində dağıdılmış kəndlərimiz ən müasir texnologiyalara əsaslanan quruculuq konsepsiyası əsasında bərpa olunur. Hazırda "ağıllı kənd"də tikinti işləri sürətlə davam etdirilir.

Ərazidə ilk olaraq tam izolyasiya olunmuş və innovativ tikinti materiallarından istifadə edilməklə 200 fərdi evin tikintisi həyata keçirilir. Bu evlərdən 160-ı birmərtəbəli, 40-ı isə ikimərtəbəli olacaq. Tikintiyə xeyli sayda işçi qüvvəsi cəlb edilib.

İlk dəfə həyata keçiriləcək "Ağıllı kənd" layihəsinin icrası 5 komponent üzrə aparılır. Bunlar yaşayış, istehsal, sosial xidmətlər, "ağıllı kənd təsərrüfatı" və alternativ enerji sahələridir. Evdaxili mühəndis kommunikasiya, isitmə sistemləri də ağıllı texnologiyalar əsasında qurulur. Bütün yaşayış evləri, sosial obyektlər, inzibati və ictimai iaşə binaları, kənd təsərrüfatı məhsullarının emalı və istehsalı prosesi alternativ enerji mənbələri ilə təmin ediləcək.

Evlərin gələn ilin əvvələrində təhvil verilməsi planlaşdırılır.