Arxa buferə stop və duman işığı quraşdırmaq olar? - İZAH - VİDEO

Son dövrlər bəzi avtomobil sahibləri arxa buferdə yerləşən işıqqaytarıcıları çıxararaq onların yerinə əlavə tormoz və ya duman işıqları quraşdırırlar. Bu dəyişikliklər, əsasən, avtomobilin arxa hissəsini fərqli göstərmək məqsədi daşıyır.
Bəs qanun buna icazə verirmi? Avtosfer.az xəbər verir ki, mövcud qaydalara əsasən avtomobilə əlavə bir ədəd tormoz işığı quraşdırıla bilər. Lakin bu işıq yalnız müvafiq texniki standartlara cavab verməlidir.
Əlavə tormoz işığı bir çox avtomobillərdə artıq zavod tərəfindən təchiz olunur. Əgər avtomobildə bu işıq yoxdursa, onu sonradan arxa şüşənin yuxarı hissəsinə yerləşdirmək olar.
Duman faraları da əksər hallarda avtomobil istehsalçısı tərəfindən quraşdırılır. Lakin bu işıq cihazları yoxdursa, bəzi sürücülər arxa buferdəki işıqqaytarıcıları çıxarıb onların yerinə duman faraları quraşdıra bilər. Bu halda da texniki tələblərə ciddi şəkildə riayət olunmalıdır.
Avropa İqtisadi Komissiyasının qaydalarına görə, arxa duman işığı ayrıca düymə ilə idarə olunmalı və elə qoşulmalıdır ki, sürücü mühərriki söndürüb yenidən işə salanda duman işıqları avtomatik sönsün.
Bu yanaşmanın əsas məqsədi sürücünün duman işığını yandırdığını unutmasının qarşısını almaqdır.

Fərid