Başını lyukdan çıxaran sərnişinə görə sürücünü hansı cəza gözləyir?

Son zamanlar sürücülər avtomobildə gedən sərnişinin başını lyukdan bayıra çıxarmasına görə yol polisi əməkdaşları tərəfindən saxlanıldıqlarını bildirirlər. Saxlanılan sürücülər  redaksiyamıza çoxsaylı müraciətlər ünvanlayaraq bunun nə dərəcədə doğru olduğunu soruşurlar.

Avtosfer.az xəbər verir ki, sərnişinin başını lyukdan kənara çıxarmasına görə İnzibati  Xətalar Məcəlləsində xüsusi bir məsuliyyət tədbiri nəzərdə tutulmayıb. Lakin sərnişin bu hərəkəti etmək üçün ayağa qalxmalıdır. Qanunvericilikdə isə qeyd olunub ki, nəqliyyat vasitəsində  gedən sərnişin  təhlükəsizllik kəmərindən istifadə etməsi zəruridir. Başını lyukdan bayıra çıxaran sərnişin təhlükəsizlik kəmərini taxdığı halda ayağa qalxması qeyri-mümkündür. Çünki avtomobillərin konstruksiyasında nəzərdə tutulmuş kəmərin üçnöqtəli olması ayağa qalxmağı və ya hər hansısa bir hərəkəti etməyi məhdudlaşdırır. Lyukdan bayıra baxmaq üçün mütləq təhlükəsizlik kəməri açılmalıdır. Buna görə də başını bayıra çıxaran sərnişinin hərəkətinə görə sürücü yox, sərnişin məsuliyyətə cəlb edilməlidir. Təhlükəsizlik kəmərindən istifadə etməyən sərnişin üçün qanunvericilikdə 30 manat məbləğində cərimə nəzərdə tutulub.

Nərminə Əli