Xəttin üstünə çıxaraq davamlı "at çapanlar" - VİDEO

Söhbətə uzaqdan gəlsəm də, vəziyyəti dəqiq təsvir etmək üçün buna məcburam. Fransanın Yol hərəkət qanunvericiliyində belə bir ifadə var: “chevaucher la ligne continue”. Bunu Azərbaycan dilinə tərcümə etsək belə alınar: davamlı xəttin üstündə at çapmaq.
Bu səhər Babək prospektindən Yusif Səfərov küçəsinə gələrkən (saat 09.14) rastlaşdığım vəziyyət də məhz bu idi. Sürücülər (əlbəttə ki, hamı deyil) tuneldəki davamlı xəttin üstündə bir növ at çapır, şahmat oynayırdılar. Bu şahmat oyununda sürücü vaxt baxımından ən yaxşı halda saniyələr qazanır, və ya bir maşın irəli düşür. Əvəzində isə bu xırda qazanca görə həm özünə, həm də başqalarına təhlükə yaradır.  Üstəgəl, birinin davranışı digərinə pis nümunə olur. Davamlı və ya qoşa xətti tapdalamaq və ya ortalamaq bütün milli və beynəlxalq qanunvericiliklərdə qadağandır. İstisna yalnız xüsusi avtomobillərədir.  Mən isə bu gün həmin yerdə heç bir xüsusi təyinatlı avtomobilə rast gəlmədim.

Vüqar