Polis maskaya görə cəriməni yerində aldı - Sürücüyə 20 manatlıq "sürpriz" - FOTO

Bakıda karantin postunda dayandırılan sürücünü Bakı Nəqliyyat Agentliyi cərimələyib. 99-CF-545 qeydiyyat nişanlı “Opel” markalı avtomobilin sürücüsü Niyaməddin Məmmədov Avtosfer.az-a müraciət edərək bildirib ki, yanvarın 3-ü paytaxtın Qara Qarayev prospektində hərəkətdə olarkən polis əməkdaşları tərəfindən karantin postunda dayandırılıb. “Maskadan düzgün istifadə etmədiyim üçün mənə 100 manat cərimə yazıldı və sonra  göstəriş verildi ki, sağda dayanaraq cəriməni “Toyota Prado”da əyləşən polis əməkdaşına verim. Mən, “Toyota”ya yaxınlaşıb mayor rütbəli polis əməkdaşına 101 manatı verən zaman Bakı Nəqliyyat Agentliyi tərəfindən 20 manat məbləğində cərimələndim. Lakin mən öz xoşuma dayanmamışam. Polis əməkdaşının göstərişi ilə dayanmışam və  fotodan da aydın şəkildə görünür ki, qara rəngli “Toyota”nın yanında dayanaraq pulu ona verirəm”.

Qeyd edək ki, bir neçə gün öncə Daxili İşlər Nazirliyinin mətbuat xidmətinin şöbə rəisi Elşad Hacıyev açıqlama verərək bildirmişdi ki, "karantin postlarında dayandırılmış şəxs barəsində müvafiq araşdırma aparıldıqdan sonra onun barəsində protokol tərtib olunaraq sərbəst buraxılır". Lakin vətəndaşlar tərəfindən edilən şikayətlərdən görünür ki, polis əməkdaşları cəriməni ödətdirmədən onları sərbəst buraxmır.

Təbriz