Səkini zəbt edən sürücülər piyadanı körpəsi ilə yola çıxmağa məcbur etdi - VİDEO

Paytaxtın Nəsimi rayonu, Asif Məhərrəmov küçəsində dayanma və durma qaydalarını pozan sürücülər kameraya düşüb.

Bu barədə izləyicilərdən biri Avtosfer.az-ın “WhatsApp” ünvanına video göndərərək məlumat verib. Hadisə iyulun 28-də saat 11:30 radələrində “Premium Clinic”in qarşısında qeydə alınıb.

Kadrlardan görünür ki, 90-ZU-889 dövlət qeydiyyat nişanlı “KIA” markalı, 77-TA-277 dövlət qeydiyyat nişanlı “Hyundai” markalı, 44-CG-990 dövlət qeydiyyat nişanlı “Mercedes” markalı və “Range Rover” markalı avtomobillərin sürücüləri nəqliyyat vasitələrini piyada səkisinin üzərində saxlayıblar. Nəticədə piyadaların hərəkəti məhdudlaşıb.

Görüntülərdə uşaq arabası ilə hərəkət edən piyadanın səkidən keçə bilmədiyi, yolun tamamilə bağlanması səbəbindən azyaşlı övladı ilə birlikdə məcburən hərəkət hissəsinə çıxaraq yoluna davam etdiyi də əks olunub.

Şikayətçinin sözlərinə görə, “Premium Clinic”in qarşısında demək olar ki, hər gün eyni vəziyyət müşahidə olunur və səkidən istifadə edən piyadalar mütəmadi olaraq çətinliklə üzləşirlər.

Qeyd edək ki, piyada səkisində dayanma və ya durma piyadaların təhlükəsiz hərəkət hüququnu məhdudlaşdırmaqla yanaşı, yol hərəkəti qaydalarının da kobud şəkildə pozulması hesab olunur.

Nərmin