ABŞ-da təyyarə evə çırpılıb, ölənlər var

ABŞ-ın Minnesota ştatının Viktoriya şəhərində birmühərrikli “Mooney M20” təyyarəsi boş qalmış evə çırpılıb.

“Report” xəbər verir ki, bu barədə Minnesotanın yerli CBS telekanalı bildirib. Məlumata görə, hadisə zamanı bir neçə nəfər həlak olub.

Hadisə yerli vaxtla saat təxminən 17:40-da (Bakı vaxtı ilə saat 2:40-da-red) olub. Mülki Aviasiya Federal İdarəsinin məlumatına görə, təyyarə Aleksandriya aeroportundan səmaya qalxıb və İden-Preri şəhərinin hava limanına doğru uçurmuş.

Karver dairəsinin şerifinin ofisi hadisə yerində bir neçə nəfərin həlak olması haqqında informasiyanı təsdiqləyiblər, ancaq ölənlərin sayını açıqlamayıblar.

Hadisə ilə əlaqədar Nəqliyyatda Təhlükəsizlik üzrə Milli Şura tərəfindən araşdırmalara başlanılıb, ona Mülki Aviasiya Federal İdarəsi dəstək verir.